Os suevos foron un conxunto de pobos xermánicos procedentes do norte de Europa. O seu asentamento primitivo atópase na zona do mar Báltico, chamado polos romanos Mare Suebicum. Nas súas migracións, os suevos dirixíronse cara o sur e o oeste, quedando un tempo na zona da Alemaña moderna. Nesta época, varias tribos separáronse do grupo central dos suevos para formar os alamáns. O 31 de decembro do 406 os suevos xunto a alanos e vándalos atravesaron os limes que separaban os pobos xermánicos do Imperio Romano. Tras permanecer un tempo na Galia, os suevos asentáronse en Gallaecia cara o ano 410. Debido ó seu escaso número estiveron agrupados. A súa forma de goberno era a monarquía.
